Førjulsmarknad i Øye

Skrive 15. november 2011 av Eirik Høyme Rogn

Fyrstkomande helg inviterer ei tjuetals handverkarar frå Vang til førjulsmarknad på Øye skule. Alt frå bakst til måleri er blant godbitane du kan kjøpe med deg heim.

Markanden er ei vidareføring av lange tradisjonar med julemarknader i Øye, og går i år over to dagar - frå klokka 12 til 16 både laurdag 19. og sundag 20. november.

- Vi kan love mykje tradisjonelt og godt handverk frå Vang. Eit tjuetals flittige handverkarar har strikka, sydd, vevd, bakt, snekra, måla og stått på, fortel Kari Hermundstad og Ingebjørg Wigdel i arrangørkomiteen.

Blant utstillarane finst også utflytta vangsgjeldingar frå Hardanger og Lærdal.

Sundag klokka 11 er det også gudsteneste i Øye kyrkje, kor blant andre Anne Lajord Belsheim og Høre Mannskor deltek.