Tyinkrysset og Filefjellstuene ynskjer velkommen!

Skrive 5. juli 2012 av Magne Grihamar

Båe dei to kjente og kjære reiselivsverksemdene våre på Tyin-Filefjell er opne gjennom kvar dag gjennom heile sommaren. Vangivaldres.no har vore ein snøggtur innom dei no i starten av juli.

På Filefjellstuene er det Hanne Fjeld og Jolanta Akelaitiene som sit ved roret. Dei kan fortelja at dei no har sett saman ein spennande sommarmeny for svoltne magar. Restauranten blir open kvar dag gjennom heile sommaren. I tillegg til sommarmenyen kan ein kvar helg koma til pizzabord og eta så mykje ein vil, fortel Akelaitiene.

På Filefjellstuene er det også moglegheit for å få overnatting i hytter rundt hovedhuset. Filefjellstuene har i år fått oppgåva å huse musikarane som skal spela på Vinjerock, så det gler vi oss til, avsluttar Akelaitiene.

Anders Lykken bak resepsjonen på Tyinkrysset

På Tyinkrysset ynskjer Anders Lykken oss velkomne inn, og viser veg inn i den nye flotte kafeen. Lykken fortel at dei no har ein rikhaldig meny med innslag av lokale råvarer i fleire av rettane. Men her finns det også dei meir tradisjonelle rettane, som ein finn på veikroene rundt i landet, fortsett Lykken. Ein skal ikkje gløyme at det er dei vegfarande mellom aust og vest som er vår viktigaste kundegruppe, legg lykken til. Han nyttar anledninga til å ynskje også dei lokale til fjells for eit betre måltid. Tyinkrysset er ope for servering kvar dag, og i tillegg til overnatting på sjølve Tyinkrysset Fjellstue, kan du også ved resepsjonen her få booke overnatting på Filefjell Høgfjellseter og Nystuen Hotel.