Tidsbilde frå Bøaflato

Skrive 20. september 2011 av Nils Rogn

I denne «Den gong då»-spalta er det meininga å sjå litt tilbake på smått og stort som har skjedd i Vang opp gjennom tida - og då helst med ein egna illustrasjon attåt. Her er det sikkert høve for fleire til å ta tastaturet fatt, men inntil vidare skal eg prøve å fylle denne spalta.

Min innfallsvinkel vil vera prega av utval frå ei stor samling gamle postkort og foto, som eg knyter nokre kommentarar til. For kjøparar av den årlege Vangskalenderen vil noko av stoffet vera attkjenneleg, i alle fall er det slik med dagens tekst som er henta frå septemberbildet i 2006. Einar Reidar Bøe har vore god kjelde for opplysningane.

Bøaflatadn like etter krigen

I førtiåra var det oversiktleg på Bøaflato. Det var ikkje mange husa å halde greie på og lite attgroing. Dette postkortet som truleg er frå like etter krigen, viser frå venstre huset til Birger Bøe. Vidare ser me også ei lita støge på utsida av vegen som står den dag i dag. Her budde skomakar Helge Flaten. Hitafor det, ser me bustaden som ordførar og lensmann Ivar A. Opdal bygde seg. Halvbror hans, Ole A. Opdal, budde her frå 1950. Huset til høgre vart kalla «Hønehuset» då det var brukt til den slags fe - i båe etasjane! Så har me Fjelltun med Flaten rett over taket. I det neste huset heldt Johan Kvam til. I skogen like ved Bergsån ser me taket på eit hus der Erik Bøe (Rødningen) budde. I huset heilt til høgre heldt Lars Flaten til, seinare også broren Helge. I bildekanten kan me også så vidt skimte Træet, ein tidlegare husmannsplass.

Bildet er nok take på haustparten for kornåkeren til Nils Grøv har hatt besøk av sjølvbindaren til Ove Bøe. Han var visstnok den fyrste i Vang som hadde slik reiskap. Når han spente tre hestar framom gjekk skurn raskt unna.