Frå 16.00-20.00 var det i går innsamlingsaksjon på Vang barne og ungdomsskule, med elevane i spissen og mottoet om at barn kan hjelpe barn. Og om ikkje halve Vang tømte klesskapet sitt i førekant av innsamlingsaksjonen i går, skjønner me ingenting - for eit fantastisk engasjement og oppmøte!
Inngangsdøra stod knapt stille denne ettermiddagen. Pose på pose med kleder fylte seg opp, leiker og utstyr rulla inn på bordene i foajeen på skulen. Eit heilt storstilt apparat vart sett i sving for å brette, sortere og pakke alt i ulike kategoriar og størrelser. Bamser, dukker, spel og trehjulssykler i lange baner. Hjelpande hender i alle kriker og kroker, blide fjes og høgt arbeidstempo.
For ein hederleg innsats av barna på VBU, dei ansatte, alle som hjalp til og ikkje minst dei som kom for å levere kleder og leiker til nye eigarar.
Barn kan hjelpe barn, og Vangssamfunnet kan verkeleg det å strekkje ut handa!
