– Akkurat no er det for ungdom frå 12-20 år, men det blir også for vaksne så fort restriksjonane tillet det, fortel Raymond Olsen.
Han flytta inn på småbruket Njukadn i Vang sentrum i fjor sommar. Med snart ti år som temmeleg aktiv jiu jitsu-utøvar og brytar bak seg har han no rulla i gang med treningar her i Vang.
– Eg klinte til og kjøpte spesialmatter i vår og det ordna seg etter kvart med å plassere dei her i styrkerommet. Her er det eigentleg heilt ideelt med god takhøgde, flott utsikt og moglegheit for enkel styrketrening i samband med treningane.
Vang jiu jitsu har treningar 17-19 måndag-torsdag kvar veke. Kontakt gjerne Raymond direkte fyrste gongen du svingar innom, så får du meir informasjon om treningane den veka. raymolsen@gmail.com // 471 77 811
Allsidig og sosialt
Jiu jitsu er ein kampsport med røter frå Japan som er populær over det meste av verda. Raymond har trent mest i Haugesund og Oslo, men også vore i både USA, Thailand og Brasil for å trene og gå kampar.
– Det er sosialt og bra mental trening. Ein lærar sjølvforsvar og vert sterk i heile kroppen og fleksibel på vegen. Det er også særs god trening for den som ynskjer å bli betre i mange andre idrettar, fortel Raymond.
Det er ein fast gjeng på tre-fire som har vore med dei fyrste par vekene, i tillegg til fleire som har vore innom for å teste.
Faktisk er Vang Jiu Jitsu også på Instagram der ein post er logga så langt.
